誰敢來挑戰!!

屋企夢幻BoardGame組合

(題目與圖片來自馬騮同事，即BoardGame物主)

Super Juni-CHA

為左準備弟弟婚禮，馬騮要往尖咀試衫，可惜馬騮放工遲過我成個半鐘，令到本來唔多願過海嘅我，多出個半鐘頭無地方去。

唯有過旺角行街，收到嘅任務，係經開信和，買張Super Juni-CHA 嘅相，打算喺接新娘時，KO一個姊妹嘅機關槍咀用。

臨近聖誕，四週商舖減價，購物嘅人亦多左。特別係賣奇怪搞笑嘅精品店，櫥窗外迫滿人羣。

去到第一間專賣偶像相片舖頭，

我：「老闆，有無Super Junior嘅相賣？」

老闆：「(汗...)無呀!」

我走時，側邊兩個揀緊相嘅妹妹仔仲用奇怪眼光望住我。

之後入去第二間，

我：「老闆，有無Super Junior嘅相賣？」

老闆：「有，請埋邊! 」

我行到埋去，售貨員放低兩疊相。

我：「(滿面問號) 吓，不呢疊係架啦？」

完全唔認得邊隊係Super Junior。~~~~

隨住互聯網發達，明星相隨時搜尋就有，早覺得賣相呢一行好難做。今日堂堂一個男人竟然要去買相，仲要係Super Junior~~而且...要收大拿拿$5蚊一張.....灰仔

弟弟結婚過後，將相真係送出左，但講係Super Junior M，唔係Super Junior
都係唔識分~~亦無興趣分。

其實，除左買相，另一項想做嘅，係買隻「守護甜心」扭蛋，開口問老闆時，卻毫無怯意。同樣係女仔野，一樣係想做，一樣係唔想做，熱衷程度竟然會差咁遠。

唱歌好溫暖~~好混亂？!

我想有高層千尺背山面海~~

聖誕不平安

聖誕歌聲開始響起，兒童聖詩也練習近4至5次，今日由自己雙手彈出平安夜，真真正正感覺到聖誕就快來臨。

今年負責統籌西寶城商場節目，包括獻詩，與會眾玩遊戲，及西環行一個圈報佳音。
平安夜前要完成練習兒童獻詩+大人4部+樂器，6次採排+3次獻唱。
另外，月尾幫弟弟婚禮綵排獻詩。
總覺得，忙於籌備練習，今年聖誕節不太平安。

最可笑係，先後聽到兩位，本來態度積極，想在今年聖誕有一番作為，也相繼殽底。
包括起初話練多啲，後來又嫌多；又例如建議唱4部，但見到份譜又嚇怕左。

財經講座弟兄，再提提我，這是神給我的分，要享受，也要付出。
工作是神給我的分，不要埋怒。
恩賜是神給我的分，我要運用，神才會給我更多。
因此，我要努力工作，盡心事奉，好好管理神賜我的分。
亦靠著這份信念，成為今個月事奉的動力。

聖誕熊

為左換隻聖誔熊，竟然入左間香水舖。裡面除左保安，同一位點貨職員之外，其他包括售貨員、排隊、購物等通通是女人。顯得我一個男人在排隊，唔買香水不突止，仲要對收銀果位問有無聖誔熊換，有點兒老尷。

為博妃子一笑，鼻敏感發作，出舖後連打5個噴嚏~~

辦公室小品

整容前

整容後

隔離部門有個可惡同事，成日較凍d冷氣..一凍d我就流鼻鼻~~

因為太凍，我今朝終於頂唔順，用5張A3紙貼在天花風口位，立即暖返~~

另外，我隔離位來左個太子~~當我地所有同事仲係用緊PC時，太子既位竟然有一部係最新既iMac, (27寸顯示屏咁大)，一部係Mac book...即(我兩位弟兄加埋，一部大機一部手提)
周邊同事行過都會望一眼.... 連另一個電腦部老細，都大大聲講，講到公司電腦...你玩哂啦!!!

太子仲要係佢老豆買左部電腦俾佢，佢自己都未知~~

幾耀眼...超有錢，超羡慕...

太子第一日返工，仲有d婆婆嬸嬸來橕場~~
點解我咁命苦~~

一日之內，電腦開唔着，電話電池壞左，公司坐位大掃除時打爛杯，兼夾親手指尾，巡視地盤時羽絨半邊衣袖黏到油跡~~乾洗店同Yahoo知識都話洗唔甩~~

早排睇過一段關於減壓力電郵，其中一點係，有野壞就盡快維修，可減壓及減低因用唔到電器而心情轉壞。
仲要開會統籌西寶城平安夜晚會，真係EQ少0的都唔掂。

睇2012... 又唱K...「地球很危險」...
買手飾化妝品... 逗留在Sogo...「銀包很危險」...

2週年快樂!!

廣告電話收得多，竟然收到個來自「必瘦站」嘅電話。
「必瘦站」打來騷擾我本身已經錯，仲要打俾一個咁瘦嘅我，就係錯上加錯。

好威呀。以前係草稿通告俾上司改，今日係改人草稿嘅通告。有中文同英文，仲要一改再改，感覺好爽~~

學以致用

原來當學術運用到現實應用時，最難唔係d算式點計，而係搵返題目原本設定既數值先頭痕。

例如
(1) Design for girder depth span/10
Take the overall depth of the grider as 1200 mm and assume that the flange plates are over 40mm thick. Then the design strength from BS 5950: Part1, Table 6, for plates is py=245N/mm^2.
The flanges resist all the moment by a couple with lever arm of, say, 1140mm, as shown in Figure 6.16(a). The flange area is:=5232 x 10^6 / (1140 x 245) = 18733mm^2

我要計既，唔止係 18733mm^2咁簡單，仲要搵返現實上 1200mm, 40mm, table py值，及1140mm等數值。

計唔難，搵呢d數值先頭痕。

不過...能學以致用，沒有浪費大學三年所讀，可謂人生既滿足又充實的一刻。

萬碎萬碎萬萬碎~~

今日去淺水灣豪宅睇漏水~~
上門視察維修工程咁多年，從未試過.........

打爛野!!!~~

仲要係有錢人的燈罩
據聞該名租客係跨國電訊公司老闆。
其單位過千尺，月租過六萬，飽覽無敵海景。

但係有錢人先至難服待....經常嫌三嫌四...又話花灑水壓低，又話外牆漏水~~
依家爛燈罩，唔好好服待，維修返個熱水爐，分分鍾要claim返燈罩錢，
老吹係古董，成六七十英磅就幣~~

好在，唔打爛野，都唔知道，原來勞工法例保障所有打工仔....最多賠港幣$300...其餘老闆食...
噓..都無咁驚~~

超眼瞓，仲要睇Hoarding，拆樓圖，勁傷神~~

網上大富翁

大富翁玩得多，香港版最多係有淺水灣，山頂。但這個由Google 同孩之寶新出既網上大富翁，於09年9月9日香港時間下午6:00正式推出，透過Google Map，可以買下自己住開既街，起樓等等。同全世界一齊玩大富翁，機會咭亦會從天降落。

http://www.monopolycitystreets.com/

買左教會樓下，西環長大既地方。

英國讀大學時既department同租住既街。

估唔到我就係喺呢個區域渡過左3年大學生涯。青春~~~

真係搶手，第二日成個西環、中環、尖沙嘴都被人買哂。

青春~~

籃球 談天 友誼

星空

青春~~

上司復職

兩星期前，上司遞信辭職。於是，所有伙記及包括我在內，在工作模式上均有新適應。

自從上司決定辭職後，才發現以往運作開的系統是很順暢。
沒有上司後，除了做埋上司那份之外，還要直接面對老闆飄忽的要求。
以往當遇到難題時，可以安然請教上司，上司肯教，我又肯學，是難得的良師。
但這兩星期，我開始適應靠自己解決問題。

以往，管理好伙記日常工作，及安排一大堆維修項目，是我每日向上司交差的其中一項任務。
但今日，與伙記保持良好溝通，再不是為着什麼交差，而是純為使配搭上更流暢，運用伙記恰當，係會幫到自己。

上司打算開新公司，我已經恐防上司在建立新公司後會忘記我，再三同上司講，待上司新公司落成，一定要請我過去。原因是跟上司有野學，總好過留係舊公司待老闆罵。每次我提過後，上司總是點點頭。

這兩星期內，我提左兩次，一次是上司遞信後的一日，另一次是今日。

豈料.........今日收到消息。上司復職!!!!!

因老闆娘，及老闆的表姨開會幫上司求情，上司向老闆道歉，就算數，話哂佢地都做左20年賓主關係。

消息來自我伙記，聽到後大家高興也來不及，一切運作可以如舊時一樣，雨過天青。
同時宣佈，我這放左兩星期嘅自由身，又要重返被上司睇實的日子。比如，唔可以遲到早走，不再無皇管，安排返上司緊張的項目為首等等。

當然，一切都值得的。

暖屋掘金打油詩

水哥電郵:
暖屋?
呢個星期六，係咪有節目？水姐有間屋，我地又咁熟......

回覆:
掘金的一族
人數最多六
再多會局束
要起勢執屋

爆甲~~

可能係忙到沖昏頭，左手拇指因放回檔案夾時，爆甲受傷，指甲流血。想洗手消毒時，卻被同事霸住洗手盤。

收到新咭片，卻忙到無時間欣賞。

收工後，行傢俬舖睇衣櫃，又有些手尾要從舊屋搬過來。

身心疲累，什麼閱讀宋辭李清照，作曲填詞通通無精神寫。

上司走已成定局，打算將介紹入呢間公司嘅判頭拉走，另行自立公司。
講到明呢個月，上司比較得閒，只會完成手頭上未完成工作就得。
相反，我要跟埋平時上司那份，會比較辛苦，一人做兩份。

一方面，要適應新工作模式，直接面對老闆。另一方面，要同餘下嘅伙記打好關係，至可以搞掂呢段交接期。

外母竟然想週六朝上來玩Wii Tennis。即係我要今晚內係書房堆亂箱內，搵返部Wii出來，set埋。
要盡快執屋，因應承朋友週日上來新居到訪開組。即係要搵埋盒Rummikub同Pictionary出來。
剛巧星期六晚慶祝家姐生日，同屋企人食飯，撞正教會開組。

我只想週六日待在家中休息下，已無精神應酬。
工作適應，家庭新居執屋，接待朋友，親人聯絡....

原來少左拇指，整起野係好唔方便。
一對手，指頭受傷，力從可來？

上司辭職

一場大男人面子與權力嘅鬥爭，在上司遞信嘅早上，默默告一段落。
呢個星期，建築部愁雲慘霧，烏雲蓋頂。

上司死因係，呢三個月以來，無向大老闆匯報，無報價單經大老闆簽名，只向其他二、三老闆交差。
大老闆唔服氣，覺得上司唔尊重大老闆，話公司無左上司係唔會死。

早兩日，大老闆抄左一個電器判頭，話佢報大數，殺一驚百。
況且，大老闆開始直接搵我，或我班下屬，完全架空左上司職責。

直至，今朝聽到上司同姐仔講：「老闆就係以為我唔敢辭職。我就辭俾老闆睇。」隔無耐，上司遞左信。

下晝，老闆叫我聯絡三位下屬，一齊開會。
坐底老闆第一句：「你地嘅上司今朝遞左信，嚟緊呢個月我當佢唔存在架啦。」
我+下屬x3：「 ...」
然後，老闆逐一問我同下屬：「跟上司定跟老闆，跟上司嘅可以行出呢間房，唔使做。你地仲做唔做丫？」
我+下屬x3(無耐)：「做...」
老闆繼續：「以後，實行簡單裝修，大家搞唔掂嘅，一律外判。」

係呢段交接期，老闆話睇下我跟唔跟到上司做開嘅野，如睇數，評估報價單係唔係合理，同顧問商討承建項目等等。跟唔掂，就請返個上司返來。如果跟到，幫我請多個下屬跟我現在做緊嘅野都得。之但係，請個新上司來，佢又唔知頭唔知路，咪又係搵著我地嚟搞。

我本來負責睇我班下屬，安排所有維修工程，同客戶聯絡。有咩唔明，背後都有上司頂住，任何技術上嘅問題，都可以請教上司。上司又肯教，跟住上司我可以學多好多野。點知一個早上就變哂。嚟緊係呢個月內，好多大少問題，都要靠自己，同一班以往聯絡開嘅判頭去解決問題。

除左要適應呢段交接期，仲要改變工作嘅模式，直接向老闆交待，學下睇埋盤數。例如，唔同判頭嘅人工都唔同，有分大工、細工，唔同物料，工期，都係關乎到工程總金額嘅多少。心知道，就算同老闆講工程，老闆都唔係建築底，佢只會睇總數，唔會理會其工作細節。老闆都話：「我搞得掂d野，唔使煩老闆仲好。 」又要應付隨時報大數嘅判頭，對上對下。

而班下屬係要個頭，跟清淅指示行，下屬唔會諗點行，只會跟我落嘅決定，因此，我都要學習有力地落決定，等班下屬服。其中一個伙記，話諗住搵上司食餐飯，當係送別，好來好去。

開會過後，同班下屬去左間茶餐廳食下午茶，係有史以來第一次。叫做大家過下冷河，冷靜一下。但有大食大，餐下午茶竟然係我請。仲話我升左，我即刻回下屬，「有咩用丫，要加人工先得架。」

上司走左，好處係只要搞得掂d野，其他咩都唔會理，某程度上係寬鬆左。變左唔會再好似以前咁，只係係上司面前表現盡責，有咩問題，唔使請示上頭，可以自行決定。但係要主動跟地盤，直接同老闆交待，有咩事就硬食，有好有唔好。

下晝，施工策略有明顯改變。即時開展一堆新地盤，一堆老闆想睇嘅盤。如中環利源東街，尖沙咀。方向係搵一d易租出去嘅盤來裝修。

一個月內，試下做埋上司做嘅野，係時候學習獨當一面。雖知道，無左個良師，十分可惜，但路仍然要繼續行，就唯有交俾主宰太陽，統領我生命嘅神導航。

抽水打油詩

我今日返工行程就精彩啦！

朝早10:00上山頂睇defect，下午4:00過海旺角睇滲水

我伙記中段仲要落淺水灣睇舖木地板報價

真係上山下海一日遊。



點知，下午伙記要留係淺水灣，

我就取消左過旺角，

平時習慣返到公司會補封電郵俾馬騮，通知佢我收工地方改左。

於是乎....以下就係我地返工既電郵對答。



我: subject: 出山啦~~

馬騮...我係山頂返來啦~~

山頂無敵景觀，可以見到南灣遊艇會，海洋公園，係d雲上面~~，超靚



馬騮: re: 出山啦~~

太平山,又名馬騮山.

山上住著一隻馬騮,名叫亞騮.

有一日,佢係山上住到悶悶地,

就偷偷走左落山玩, 去左一度叫砲台山的地方.

佢發現果度d燒餅同蛋tart都好好味,

於是就唔肯返反上山喇!



我:re: 出山啦~~

寫劇本?...汗.....



馬騮女 好多咀
吹水永遠唔抺嘴
隨時贈團友一句
坐不改名愛抽水

天生麗質淡如水
熱情滿腔若花絮
溫文淑賢秋麥穗
美若漫天櫻花醉

名牌手袋逐個追
冷手執個熱煎堆
wiifit板抽筯大腿
得把口減肥萬歲

近期執箱搬新居
積埋衫褲一大堆
轉頭就呼呼大睡
好在會抺下家具

其老公大方不拘
幫佢執屋多疲累
抱頭痛欲哭無淚
任勞任怨永不衰

最清楚馬騮心水
佳節送熊仔俾佢
歷年MoMo愛相聚
陪佢枕邊永相隨 永相隨

夜醉樂-解說

背景：
筆者剛搬完屋，新居位於一處橫街窄巷。
位置屬舊教會附近，自小每星期經過一次，只是數年前才遷走。
因搬屋關係，好一段時間沒彈鋼琴。
剛剛將書房內的紙箱收拾妥當，欲打開鋼琴彈奏。

「奏琴餘音傳陌巷 懶理房塵漫天飛 」
重溫生疏的琴音，重返自小行過的窄巷，
琴音與陌巷，兩者交錯，同樣需要重新適應。

琴鍵與紙箱的塵埃，在書房內飛舞。
習慣上有清理房間的責任，卻可暫時放下。

「細味宋詞意逍遙 閉眼指頭舞自在」
一邊領會着宋詞的意境，一邊閉着眼睛彈琴，指頭熟練至忘我境界，自動起舞。宋詞與旋律的意境，兩者同樣逍遙自在，悠然自得。

「輕曲思緒秋水流 酒氣意識夢難化」
思緒隨着旋律飄流。細閱愛看的書，品嘗愛喝的酒，其着迷感覺在腦內徘徊，難以入睡。

「曲酒醉人霧迷濛 夜深此情向誰訴」
經過這段忙着搬家執屋的日子，回贈自己付出過的勞苦，無非為着此刻，可安坐家中，放鬆嘗酒，閱讀宋詞，奏曲作詞，稍事歇息。夜闌人靜，這份滿足感又可向誰傾訴？

夜醉樂

奏琴餘音傳陌巷 懶理房塵漫天飛
細味宋詞意逍遙 閉眼指頭舞自在
輕曲思緒秋水流 酒氣意識夢難化
曲酒醉人霧迷濛 夜深此情向誰訴

迷上求婚大作戰

昨晚一口氣煲7集至凌晨3:00...今晚繼續~~「求婚大作戰」 實在太好睇啦~~

男女主角青梅竹馬，互相心誼對方，卻因本身朋友關係根深蒂固，一直未敢表白，未能衝破朋友關係，白白浪費一段美好姻緣。

直至婚宴上眼見女主角快要嫁給別人，重播着舊日回憶合照，抱着後悔，概嘆沒有向女主角表白。豈料，天賜下返回過去機會，能否改變命運，成為女主角的新郎呢？

即使每次返回過去，事實並沒有如願以償，但憑着男主角的努力，女主角的芳心卻慢慢被打動。

每集的細節，每句對白也沒有浪費，均是按着每集的結尾舖排，首尾呼應，既感動又驚喜。

例如第五集，男主角(健)知道女主角(禮)爺爺將於半年後過身，催促禮必須將合照交到爺爺手上，及對爺爺講他整的煎餅是最好食，有話就要立即說，不要待機會浪費時才後悔。但健只懂得催促禮，自己卻同時在浪費着向禮表白的機會，為何偏偏要等到適當場合、時間才去表白？

劇情中段，老師對禮講：建築師的圖則是給承建工人的情書，「請你照着這份圖則去建築吧！」

(起初奇怪為何中段加插這一段劇情，尤其是當自己係做這行，覺得份外牽強。現實上建築師唔捽死承建商已經偷笑，莫講話什麼情書。)

後來直至爺爺在回程巴士上，打開禮兒時畫給爺爺的第一幅畫，畫中爺爺站在屋中，右下角寫着：禮是修讀設計，爺爺則是木工，這幅圖畫就是禮給爺爺的情書。

這幕沒有任何對白，單憑畫面交待這真摰的情境，如果睇漏中間一段，就會錯過這感動位。可見導演與編劇的功力。

單睇頭7集，令我回想起讀書時期那份傻勁與衝動。

另外，劇中還有些人生晢理：

「改變命運的奇蹟，從不會匆匆出現，但只要懷抱改變的心，一小步一小步不斷的累積，總有一天，奇蹟之門將會為你敞開。」

成功不是一步登天，必須日積月累，花時間經營。感情亦是一樣，甚至係青年事工，必須要有與他們同行的時間，陪他們同笑同哭，關係才可建立。

「放假不成，今晚食「燒鵝」洩忿~~」

鵝過也...煲劇夢斷...

還要起身追巴士，一口氣跑足5條街~~
放假不成，今晚食「燒鵝」洩忿~~

話說颱風「天鵝」襲港，臨近香港才撻Q轉彎。
於是我facebook興起點題~~

facebook status:
「放假不成，今晚食「燒鵝」洩忿~~」

收到一班酒肉朋友回覆:

A: 咁都得...
11 hours ago ·

B: 我自備雙筷？
10 hours ago ·

C: 係邊先？
9 hours ago ·

D: 留返舊俾我！
9 hours ago ·

E: leave one to me
4 minutes ago ·

千奇唔好睇少食物既吸引力~~

辦工室偷閒

話說颱風天鵝襲港，預計聽日打8號風球機會好大。於是，大家成機想搞探訪新屋掘金House Warming Party~~

節錄SMS-email對話：

水哥：喂~如果聽朝你地有得放，不如上你地度玩掘金~我估你地有半天假 =)
水姐：蘋果d料有幾真先？我地ok,但間屋未執好無問題？不過我們無掘金，你班到嗎？
我： 蘋果d料呢家野~~ 謀事在人，成事在天。睇下個風想點打啦~~

陌生...抗拒...適應...接受...生趣...習慣...倒數...分離...不捨...依戀...

拆下畫框，留下牆上釘痕。
收拾吊架小擺設，帶不走窗外彩霞。
流下回憶汗水，蒸發熟悉氣味。
去難留。

貴人話請搬屋公司搬屋需要半日
我間屋卻只需要1小時~~
往後終於明白點解時間差咁遠~~
因為間屋都係差咁大~~

執箱期間，馬騮勁唱喜帖街，拆下婚紗相那刻，我終於明白，原來歌詞最後一句
「請放下手裡那鎖匙，好嗎？」
代表不捨得放下屬於家中最後的物品，描寫臨走一刻的情景。

真係最後一餐

31-7-09朝早就會搬離碧華閣

呢個星期總係要埋頭執拾，或約業主及地產等搞交樓，

無時間再煮飯食，呢餐真係最後一餐飯

呢兩年自然地養成嘅小習慣，

包括開飯前，待馬騮裝飯，從雪櫃攞樽泡菜出來送飯等，
將會一一化作將來的回憶。

但相信只要兩人係埋一齊，

即使地方改變，習慣依舊。

再別碧華

窗外迪士尼煙花
街邊車來去匆匆
橙雲簿霧輕快散
身邊馬騮 此刻無言
共同再別碧華閣
靜靜細味煙火熄滅

可是煙火燦爛過後，只為漆黑天空殘餘白煙

09書展搜羅

近期迷上宋詞，隻Les Miserables好低，$20隻~~

無幾多餐剩~~

就快要搬離碧華閣，將會懷念係呢個廚房內，練成一身駕輕就熟嘅廚藝。

搬屋要搬雪櫃

要起勢食哂所有雪糕

點知事隔幾日，個搬屋佬話，呢頭斷電，果頭駁電，唔使清雪櫃....正~~
佢臨走仲話：食咁多生冷野就唔好啦~~
變左我又可以慢慢嘆我嘅Baileys味雪糕~~

日缺之詩

抬頭觀看祢所造的天 祢指頭足以遮蔽日光
無光之日 祢卻默許

旁人誤以為禍 祢卻掌管災禍 容許黑暗
叫大地歸回 吸引孩兒向祢呼求

李清照《醉花陰》

近期集中填詞，不斷搜集靈感，欣賞其他填詞人，描寫景物時，如何勾畫出物我相融的意境美。

弱水三千 - 麥浚龍
作曲：馮穎琪

填詞：林夕

編曲：麥浚龍 / Jerald

監製：張亞東

三千春江水 暫住寂寞天空

逛夠了世界 撇進了春風
活著自活著 萬象在逝水中暢泳

偶爾愛上過 一些倒映

流年流成河流 流過幾道名勝

浪停下像拿著鏡 難辨舊日風景
山水非山水 涷了變雪堆

山水本山水 遇熱若霧水

混雜絕望後便是淚水衍生出心碎

葡萄若化水醉了會再醉 會跌進漩渦太虛

擠於渠裡 浸於浴裡 同樣落自春水

＃汗滴在血海紅不紅 散聚後味道如茶濃不濃

那是快感還是痛 深海裡永遠看不通

靜靜地浮游在青空 一轉身可以化進了杯中

口乾了便喝盡那密雲 像喝掉如夢如幻信不信

(三千春江水 暫住寂寞天空

逛夠了世界 撇進了春風

清水苦水一樣暫住半空

水中不起花 萬物靜默不動

碎了這塊鏡 照見了洶湧

眉頭才震動 )
Repeat　＃

( 水慢慢 飄色於天空 水慢慢 將萬物玩弄 )
活著若是夢 是夢蝶讓水色震動

撇夠了冷雨 得到升空

麥浚龍毫無唱功可言，編曲如常，Music Break夾雜女聲襯托。
吸引我的，是林夕所填的詞，按住歌手性格填詞，將詞與曲調和出浪花，腦海中徘徊。如何將水生動描寫，髭髮秀潤。

本來已覺得林夕填得好精彩，但仍未夠，於是，開始睇唐詩三百首，從中學下詩人如何在寫詩背後畫畫。經水哥介紹下，迷上宋辭李清照。

「薄霧濃雲愁永晝，瑞腦消金獸。
佳節又重陽，玉枕紗廚，半夜涼初透。
東籬把酒黃昏後，有暗香盈袖。
莫道不消魂，簾卷西風，人比黃花瘦。」

詞人滿懷愁緒，筆下景物從「薄霧濃雲」的天氣、百無聊賴的「瑞腦金獸」，到無法成眠的「玉枕紗櫥」和簾外菊花，都因詞人的心緒而顯現出淒冷、悲涼。
重陽佳節，把酒賞菊，人比菊花瘦黃，表達作者思念丈夫的寂寞心情。

尤其是末三句，絕佳。

「莫道不消魂，簾卷西風，人比黃花瘦。」

雖然屬唔同年代作品，係無得比較，但睇過李清照，再睇林夕，即時顯得空泛。
..
..
同是詞人，李清照末尾三句，勁過歷代填詞人。

但兩者皆不毒，最毒亦唔係婦人心，而係起「小雙毒」這個花名的水哥。



「周五蒲頭有點難」<---- 水哥一句勁過哂李清照三句，同林夕一首~~

導師宣教分享

好榮幸兩星期前被導師邀請上佢屋企食飯，嘆嘆印度奶茶，及無敵海景。
導師想同青少年人分享宣教體驗，搵我幫手聯絡心基靈組，參加今晚分享聚會。
雖然係打八、九號莫拉菲風球前夕，估唔到連新生命組都有組員參加，出席人數足足坐滿整個副堂。
一段敬拜，謝謝導師多年來栽培，聽過導師夫婦分享，佢地半年以來宣教嘅經歷，帶走左幾點人生態度返屋企。

一)導師貫徹始終，向著理想事奉，繼續將輔導同宣教結合。
一直以來，導師嘅異象，就係將輔導同信仰結合。
為左要在印度擁有固定身份，若選擇以學生身份，會比較容易批簽証，逗留印度繼續宣教。
學印度文，預算至少需要三五七年時間溶入當地文化，學校及教會。
聽聞當地學生是十分尊師重道，只要成為當地導師，係比較容易帶人信主，
只要繼續讀PHD，朝着成為當地導師嘅方向，不妨係一個幾好嘅事奉身份。

印度這二十年來，正正缺乏輔導及傳福音嘅知識，導師去到當地，可以開拓新方向，同時實踐自己理想。
七年前當地牧者已祈禱，希望有一位富輔導及傳福音嘅人進入當地教會，
神感動牧者，原來早已預備導師嘅路。

二)面對悲傷，導師選擇這半年來以下列三方面去醫治自己。
1)對神：每朝開口唱詩讚美神。
2)對靈修：有系統地半年內讀完整本聖經，主題環繞受傷嘅病人，對住耶穌這位夫子，抱着我地本身係病人嘅角度去睇聖經。
3)對團友：要承認自己不足，分享，哭過，彼此一同渡過這段唔容易行嘅路。

三)音姐姐：神喺你唔掂嘅時候用你。
面對親人離去，悲傷，及隱而未現，怪責媽媽等情緒，未處理好自己嘅狀態之下，又如何出發去宣教呢?
音姐姐講左一句足以"KO"嘅話。
音姐姐：神喺你唔掂嘅時候用你。
神唔係趁你掂嘅時候用你，而係趁你唔掂，謙卑時至使用你。

至於導師身邊嘅伴侶，面對導師情緒低落，發現自己可以做嘅唔多，唯有等另一半自己復完。
關於溶入文化，唔係去話俾人聽，抱住自己有幾識野嘅姿態去接觸當地人，而係去服待當地人，包括學習當地基本會話，係醫院內服待病人。
只要甘願為神去付出，神會加倍供應，包括生活上實際需要，居住地方，生活費，學費等等。

總括而言，有導師在場，當年心靈綠洲家嘅溫暖返哂來。
導師不愧係我敬愛嘅導師，一晚之內，帶走嘅人生經歷，又豈只係以上幾點，有好幾下仲打通左我同神嘅溝通。

風從那裏來~~

7月18日星期六下午2時半~~

呢分鐘過後，我同馬騮終於可以拋開炎炎夏日~~
因為...............我地唔使再...........


爭風扇!!!

把樂x牌16寸座地風扇會送到門口~~

Blog 相失踪~~

我個blog d 相無哂~~
Backup裝住圖片既external hardisk 又讀唔到~~

之前imeem 係提供upload圖片、音樂，
點知imeem 終止左圖片寄存服務，以後只會提供音樂寄存，事前完全無通知。

而近期既相已經係改用返blogger upload...

睇來要一段時間，才可以救返D相~~

豪宅配馬騮

太子爺就快結婚入夥，我負責監督其新居裝修工程。位於堅道，高層覆式連天台，廳房飽覽維港海景。
同時，太子爺要影婚紗相，搵左位專拍沙龍既攝影師幫手，而我則要安排伙記運送影婚紗相既道具，傢俬等。

搭電梯上裝修單位時，電梯內有太子，上司同我三人。太子喊昨日影婚紗相影左4粒鐘，好累，明日仲要影8粒鍾。我同上司低頭，會心微笑。唔知道上司係咪同我笑埋同一件事呢。

當時我不禁想起同馬騮影婚紗相那些片段。當日一係落雨，一係悶熱流汗，但回憶總是甜美。原來那是我同馬騮最珍貴既青春。

往後坐太子私家車，從堅道返公司，途經羅便臣道豪宅。太子住豪宅有車有司機，我究竟呢生人會唔會有咁既福份。

豪宅配美人，同馬騮一齊已經係福份，但同馬騮住海景豪宅，又會唔會有咁既福份呢?

x州火車相撞

枕邊馬騮往福州探訪孤兒院的第三個早晨，睡醒之間，聽到收音機新聞報道；

一列火車與前往福州火車相撞，17卡車廂出軌。
究竟係聽錯，定係未瞓醒時潛意識玩我？
真係嚇一嚇，即時起身開電視睇新聞，但當時只係播緊體育，內地新聞就遲遲未播。
趕住返工，要急急出門口，唯有待上網check下。

「即時兩岸
湖南火車相撞事故 救援工作有序開展
2009年06月29日 (12:58 pm)

京廣線湖南郴州火車站今日凌晨發生火車側面相撞事故，目前至少已造成 3人死亡， 60多人受傷。鐵道部部長劉志軍已抵事故現場。目前所有傷員均已被搶救出來，已被緊急送往郴州市各家醫院。電網也正在全力搶修，現場清理工作已全面展開。
(蘋果日報)」


雖然同樣係大陸火車，好在係湖南「郴州」站，唔係「福州」...
但馬騮同朋友往返大陸，順昌及武夷山等地必須乘搭交通，聽到呢類新聞時，始終會擔心~~

作曲

作曲時總會按住兩層音軌去寫。
分別係主旋律，同伴奏(chord progression)，如果講Bass line會更貼切。

好多時候聽其他作曲人寫歌時，會跌落一個盲點。
主旋律會變化，但chord就變得好少。
即係你會發現同一個作曲人寫兩首歌，兩套chord係幾乎一樣。
甚至乎連長度，節奏都無變。
因此，想尋找突破方法，
唔只係去變主旋律，而係變其chord progression，
或者係節奏，曲風等。
e.g. 由pop變R&B會係入門

最敝係變完，新鮮感過後，又想搵未試過既去試，
周而復始，無論日光定黑夜之下都無新事。

摩星嶺睇日落

難得好友相聚睇日落，感覺像多出半日假。
馬騮亦呷乾醋：「唔阻你地兩條佬談談情。」
內裏千言萬語，心知道，但不用說出口。

要處理思緒很多，想放低千斤重。
但眼前180度海景，為何錯過，大煞風景。
倒不如靜靜地，聽下浪聲打落石頭，睇下螞蟻沙丘上爬，
珍惜日落時光，雖短，但悠然自得。

帶埋相機，捕捉日落彩霞，
可惜時不與我，只能影低幾隻黑雁。
為何雁兒來來回回，向着漫無目的地飄泊。

諗着楊錫鏘牧師解讀創世記，
「第四日造光體即時令，萬物皆有定時，人也有自己的角色和崗位；
第五日造魚、雀，不同的活動領域即水或陸；
資源是神給與，人要做好本份，也有責任去做好，卻不能控制資源，神會賜福給人有能力做到要做的事情。」

總括而言，回歸大自然，返回神創造，原是美好。
抓緊與大自然融合，洗滌心靈。
時間唔夠，連熱身都未，
可惜天已黑，唯有下次，帶多幾個朋友仔再來過~~

好cute，好可愛
好cute可愛~~

好Q可愛~~

苦口良藥

想寫野，迷網，點寫?

雖知道困在憂鬱裏係唔健康，卻乏力踏出安全區。
強行理智，遮蓋悲傷，靠反射神經支配自己，感覺就可以牢牢封鎖。
生活迫人向前行，工作仍必需繼續。

最穩陣嘅地方，可能係乘搭巴士，望住窗外驟雨。
無人識我，無人理我，含束放下，感覺坦白。
腦海浮現幕幕記憶，椎心畫面，鼻頭一酸，
估唔到，迷戀悲傷。

諗起兒時，返鄉下放煙花，當時要靠一支支香來點着藥引。
燒煙花過後，唔知道支香放邊，隨手放係雪櫃。
換來燒熔雪櫃膠邊，最弊燒熔嘅雪櫃，係公公新買。
於是，滕條燘豬肉，打我果個，唔係公公，而係媽媽。
嘩嘩大哭，哭聲大到隔左兩間屋嘅柒叔柒嬸都聽到，跑過來湊熱鬧。
公公旁邊喊「打得好！」
媽媽事後捽藥酒時同我講：「唔係公公面前打我，點同公公交待呀！」
現在諗返起，都幾好笑。
估唔到兒時嘅傻，成為今日酸溜溜嘅靈藥。
苦口良藥，至少連繫住我同公公。

馬騮唔同我砌Rummikub，唯有自己左手同右手玩~~
訓練組織力-manipulation

砌Rummikub時，起身幫馬騮整野，點知意外踢跌左，
喊慘之餘，突然腦諗到新玩法，就係重組一盤已砌好既Rummikub。
棋係死既，人係生既，有新睇法，坐言起行。

"A"貨福州樂園-魔術教學

6月20日

謝謝馬騮送俾我嘅Rummikub

今日，要處理三件事。
1. 晏晝要預備魔術教學，保持情緒高漲。

馬騮同一班團友仔準備上福州，探訪當地孤兒院細蚊仔，早幾個星期已經計劃每日節目與行程。
今日團友仔去深水埗辦"A"貨，買左好多小禮物，勁開心。放工返教會見到班團友仔，最意外係竟然連我都有禮物收- 係馬騮送俾我嘅Rummikub，強調係咁多份禮物之中最"貴"嘅一份禮物。

作為後盾，都有少少貢獻，我準預左10套小魔術，俾團友仔學下參考下，隨手用最簡單嘅道具，為一班細蚊仔，帶上驚喜與歡笑。當中以「飲筒打結」，同「紙巾魔術」最易記，最受歡迎。由於唔係練得好熟，有幾個魔術都唔記得左。之前一晚，為左練習一個啤牌魔術「紅黑分明」，搞到4:00am先瞓~~所以今日一整日都好眼瞓。本來想保持低調，但表演魔術，難免成為焦點，平時還可以有信心掌握，但今日我唔得。雖然要求自己表演魔術一定要保持心情開朗，卻講解到口震震。當時嘅我，心情予盾。

第二件同第三件事想分開寫，唔想擺埋一齊。下編blog繼續~~

父親節-公公好靚

續.....6月20日

2. 公公安息禮拜當司琴
我一日內實在容納唔到兩種情緒，一個地方，一份情緒就夠。唔好將情緒帶到另一個場合，唔好將悲傷帶到朋友身上。因此，連編blog都想分開寫。

為左處理兩種情緒嘅轉接，我同自己講，當我著上一身黑色衣服後，我就容許自己完全投入懷念公公嘅情緒。

我要處理第二件事，就係一些邏輯問題，如:
音響:確保琴聲可以傳遍整個禮堂；
司琴:雙重身份，既係家屬，又係司琴。但係家屬坐係左邊，電子琴係右邊，我又唔可以係禮堂前方走來走去，要識得走位。

結果，音響簡簡單單，殯儀館內套音響只得1個channel，1個input入主禮人支咪就夠。唔使諗將套古董yamaha駁入音響內。
至於司琴企位方面，好在一開始家屬係跟住棺木步出，由右邊行到左邊，一開始就自然地企係近琴右邊。最多係臨完前，瞻仰遺容時，返回家屬身份，要混入人堆中行返去家屬左邊，總算順利。

3.藉彈琴機會抒發對公公思念
平時當司琴，習慣手指邊彈琴，內心邊敬拜神，算係訓練有數，表裡一致。但係，對住頭兩首詩歌，「奇異恩典」、「深哉，深哉，耶穌的愛」，無論旋律或歌詞，完全投入唔到。第一、二件事叫順利完成，但第三件想完成嘅事，宣佈失敗。

唯有將情緒投放在第三首歌，「耶和華是愛」，默念公公安躺於青草地上，這首歌比較容易投入。

其實一步入禮堂，接近公公軀體時，竟然要處理音響，真係比較難頂~~
整個晚上，我比較擔心媽媽，做仔嘅，呢個時候可以做嘅，就只可以搭住媽媽肩膀，行入去睇公公。媽媽喊住同公公道別「點解髮色咩黃？」我邊捉住媽媽嘅手，安慰「放心啦，公公知道嘅，公公收到啦。」
到瞻仰遺容時，見姐姐哭成淚人，亦陪左姐姐一陣。
謝謝傳道人對公公婆婆禱告，讓兩老可以互相原諒，互相接納，安詳分開。
雖然曾對編分享有期望，期望藉住這編分享，令媽媽睇見神嘅榮美，但係連我身為基督徒都聽唔入耳，又點奢求媽媽聽到，期望過左少少。
去到儀式尾段，已經眼紅紅。第一次以家屬身份接受朋友慰問，唔係好識得點做。但今晚要對外，同自己講，要大方得體，唯有忍住眼淚，都係留待明日上山才釋放情緒。


6月21日-父親節，一個特別嘅父親節
今日火化禮，身邊都係親屬，可以整個早上對內，儀式亦比較簡單，終於可以卸下司琴，家屬嘅身份，專心投入對公公嘅思念。

今早7:15起身，同屋企人食過早餐，出殯後就上山。歌連臣山，環境寧靜，公公最後係呢處落腳，應該好舒服。最難過嘅時刻，終於來臨，按掣後，公公就暫時同我地道別。

我終於唔使忍住淚水，抽泣送別公公。當婆婆站在公公面前獻花，這一幕畫面，深深刻在腦海內。諗到公公婆婆相處咁耐，行到臨別一程，現在公公享福，剩下婆婆，難過嘅程度，不敢想像。作為我對公公思念嘅小結，我內心浮起四個字，「公公好靚」。

咁多個孫之中，公公最錫嘅一位係兒時嘅我。所以，係公公婆婆爺爺同外婆之中，我係最黐公公。我亦好敬佩公公，經常同佢捉象棋。睇返舊相，佢抱起我，我抓住佢下巴嘅鬚。記得佢經常坐係教會正堂最右下角張凳，呢張凳係屬於佢。公公一頭白髮，老人家來講，真係幾靚仔。

成日聽前輩分享，人大左會眼淺，到今日終於明白，這些經歷叫人成長。好少喊，喊完真係有點累。回顧這兩日，清淅地俾指示自己，咩時候做咩事。咩時候要陪媽媽；咩時候指示馬騮嘅企位，結左婚就係一家人；咩時候要上前同熟識嘅教友握手；咩時候要放鬆自己，同好耐無見嘅表哥吹水；還有，咩時候俾自己釋放情緒。咁清淅，有好有唔好，比起一般男性含束，我比較識得處理自己情緒，坦白面對自己真正嘅感受。要識得大體，在公開場合，懂得對內對外，搵適合嘅地方面對自己情緒。但對自己嘅眼淚，有點陌生。

至於信仰，心急想屋企人信主。雖然好清楚應該點睇，相信公公安息主懷。但由知道公公走左，見到公公軀體，至睇住婆婆最後獻花，整段過程，不堪入目，真係要一步步來，慢慢接受，學習將眼見嘅憑信心交俾主，體會從神而來嘅安慰。人畢竟血肉之軀，面對親人離去，呢種情況，真係需要時間，沖淡哀傷。哀傷過後係疲累，可以暫時放下包伏。預留空間俾神，令見證活生生行出來。


「車隊落山，隨車遠望窗外山境，眼下一遍綠。究竟係一號風球吹走維港雲霧，定係淚水沖走積在眼袋內嘅千年塵，視野至咁清淅？開口就想流淚，識得喊嘅男人都好有魅力。這山頭是人生必經角落，化為灰燼，肥料養分。」

公公安息禮拜

收到二舅母電話，想搵我幫手當司琴，同揀首詩歌當晚唱。

一直以來，安息禮拜司琴就做得多，但送別親人嘅卻是第一次，那份苦澀嘅滋味係與別不同。
將掛念公公嘅記憶，化做詩詞與音符來表達，未到當天晚上，這情緒也未能預計，要懂得處理及釋放這份哀傷才是健康。

論到美學呢家野，無論定義或者係個人喜好，都係見仁見智~~

教家姐BB女：Bird~~(攞住M記公仔，雙手拍下拍下)

再指指碟上雞翼: Bird

煥然一新

煥然一新 瘋狂購物...

我真係幾鍾意D 衫，又斯文，又型~~仲要點襯都襯到
襯後生仲可以著得起，就唔好著得咁老餅
Sales 都教左我一D著衫 tips...
其實屋企仲有黑色boot可以襯, 不過，如非必要，都係襯波鞋
一次過買返十年以來無買過既T-shirt、恤衫、牛仔褲、外套... 癲左~~

唔係好過份..呵~~

要走始終要走，剩下哀傷孤單。
逝去畫面，兒時捉棋，氣人地一一浮現。
失去才懂得珍惜。
往後，活下去的婆婆要繼續活下去，
縱使再孤單仍要活下去。

A Key 4/4

3-45/F1'-1'765
3-45/F6-6543
3-45/F1'2'1'-765
i)543-/Bb2-123/G2

ii)543-/Bb2-6/E65#67

Chorus
/Am1'71'71'3/E765#5#
/F656561/C5433
23/Dm4-1'7654/Gm5-434C5

567/Am1'71'71'3/E765#5#
/F656561/C5433
23/Dm4-1'6#-5#/Em5 71'/A5
3/F43434 1' 1'/G1'767C1'

公公

6/6 3:00am

公公走左，家姐既BB女又叫我爸爸做公公~~
睇來人大左，面對親人死亡既問題，只會越來越近，避都避唔開。

好在，公公走前一星期，我地有機會見老人家一面，至無咁遺憾。

6/6星期六下午，收到媽媽電話：公公走左。除左傷心，更擔心媽媽既承受力。
本來公公唔肯講野，又唔肯飲水，精神錯亂。好在傳導人在公公走前一日，同公公傾計祈禱，公公才感到釋放，安詳地走。

我地多謝傳導人幫手，亦聽到傳導人分享探公公既經過。蒙主耶穌保守，忙於照顧細路仔、處理家務等既傳導人，竟然順利地一一解決，傳導人才能夠抽時間去探訪公公。

而婆婆係我心目中，係一位好好婆婆，從來只會主動付出，絕少麻煩別人。因此，婆婆好客氣，唔想麻煩傳導人上來探訪公公。而且，姨媽見公公衰老，樣貌太醜，建議公公既朋友都係唔好去探佢。所以，公公幾孤單，臨走時都見唔到朋友。而我覺得最可悲既係，一個人臨老既時候，唔單止無野可以帶走，連朋友來見面既決定權也要由其他人來決定。

當傳導人見到公公後，本來神智不清既公公，竟然瞪大雙眼，第一句就直呼傳導人全名，睇來公公其實很清醒。

傳導人：掛唔掛住婆婆？
公公搖頭。
傳導人：掛唔掛住仔女？
公公繼續搖頭。
傳導人：驚唔驚？
今次，公公猛力點頭。
傳導人：掛唔掛住長青團契(公公婆婆參與既老人團契)。
公公用僅餘既氣聲講：長青團契...長青團契...(公公其實好掛住團契既老朋友)

傳導人又打比諭，每個人都在搭車，終點始終一樣，只係每個人落車時間唔同，有早有遲，但我地深信終點會在天家。公公聽到後，也感到釋放。

這年以來，公公漸漸變成老頑固，婆婆同公公關係唔係太好。傳導人臨探訪前，問清楚婆婆係唔係完全原諒公公，婆婆答係。於是，傳導人同公公祈禱，當時見公公帶住唔捨得既眼神望住婆婆，傳導人輕拍婆婆，示意婆婆，公公正望住婆婆。同時，將婆婆既手，搭住公公既手，兩位老人家，終於彼此原諒，一同祈禱。聽到傳導人分享到這裡，兩老終於復和，安然離去，我強忍着淚。

至於婆婆，一向係眾人心目中，都係好客氣，和藹可親既人。但係同公公這段關係上，變得擔心群眾眼光，怕未盡其妻子責任。好在傳導人安慰婆婆「你已經盡左力，無愧於心。」婆婆亦老懷安慰。

神透過傳導人今次探訪，將信仰活生生地彰顯係公公婆婆身上，亦呈現係未信既媽媽身上。希望媽媽能透過今次經歷，對信仰改觀。因為，當媽媽見公公什麼話也唔肯講時，竟然主動建議我地同公公祈禱，由媽媽親口講出來，証明祈禱對媽媽來講產生左重要既地位。

公公，天家再見~~

無線上網

屋企終於有得無線上網，受惠既有舊電腦一台、新電腦一台、Pocket PC一部、Wii...PSP...等等
不過，在setup Router的同一日，我部Pocket PC既火牛壞左~~
一向Pocket PC用Wi Fi 都比較食電，唯有插住USB差電~~

因此，我部Pocket PC可以無線上網，但係要駁住條USB線....
駁住條線來無線....
(無線...駁線...無耐~~~)

插曲：懷疑老豆一直用緊鄰家既無線上網，白交上網費。

棋王公公

返工期間，路經上環卑利街，石板樓梯邊見一古玩商舖。
內有海軍陸戰棋、排九、麻雀等。
其中最吸引我視線既，係一副水晶中國象棋。
每個捉棋既人，總想擁有一副精美既象棋，
令我諗起兒時同公公捉棋既時光。

兒時探訪公公，總愛與他下棋，一捉就停唔到，要捉夠整個下午才擺手。
這份情誼會藏在心底，或許公公唔會知，
公公係棋王，從來只有佢贏，我輸。但直至我贏過一次之後，媽媽就話公公老，開始無精神捉，那是我最後一次同公公捉棋。

除左捉棋，記得有一次公公白內障，我畫左張咭俾公公，但公公當時睇唔到，我就讀俾佢聽。當時我仲讀緊小學，張咭係我親手畫，封面以紅色同藍色畫出十字架形狀裝飾。

還有BB時公公抱起我影合照，我一手抓住公公既鬍鬚，一齊笑~~

仲有教會音響房對出最右下角既一張凳，公公總愛坐這張。

教我捉象棋既公公，在我心目中永遠係棋王既公公，天家再見~~

生活小品

早兩日馬騮發起條為食根，突然想食馬仔。
今晚收工經過灣仔，見到某間麵包舖有得賣，咪買返屋企，諗住逗下馬騮開心。

返屋企，醃過今晚要煮既豬扒後，返書房研究兩部電腦。因為屋企終於有兩台電腦，但未試過設定同時上網，及接駁網路芳鄰，讓兩台電腦可交換檔案。

往後，馬騮收工返屋企，我送上馬仔三件，加句：
「當我見到件馬仔，我諗起你。」
馬騮好開心：「你係第一次買小食俾我食架~~」

滿足既我，正想轉身返回廚房煮飯之際，豈料，唔記得煲飯~~換來馬騮冷笑三聲~~呵呵呵！
於是，大家唯有等飯熟。

又過一陣，終於駁通兩部電腦同時上網及交換檔案，出廳宣報這喜訊。

我：「我地以後唔使爭電腦用啦！」
馬騮冷言：「既然可以一齊上網，唔記得煲飯都係值得既~~」
我(汗)：「...好在今日買左件馬仔墊底~~」

~~~~~~~~~~~

同一晚上
馬騮：「醃豬既汁都係紅色，建議你都係唔好倒落去煮。」
我：「吓，果D醃汁係有味架，等豬肉收水後，倒落去再煮至夠味架~~」

最後，俾我發現馬騮，偷偷走去廚房，倒左D淹汁，仲係d豬扒上面加鹽加醋，駁我唔發現~~

拆琴

早排電子琴無左Sustain，冒住壞琴風險，經過深思熟慮，我真係拆開左個琴修理~~
結果：整返好~~真係一次好過癮既體驗~~

MoMo與琴


修理前


步驟(1)鬆開螺絲


步驟(2)記下螺絲位置


步驟(3揭開琴外殼


琴鍵背後


步驟(4)找出Sustain電路板及修理


步驟(5)測試妥當，還原~
彈左首「搜神記」

同場加映，修理牆腳寛頻電線掣。因之前經常斷線，修理過後，搞掂！

步驟(1)鬆開牆腳掣

步驟(2)更換損壞電線