無線上網

屋企終於有得無線上網，受惠既有舊電腦一台、新電腦一台、Pocket PC一部、Wii...PSP...等等
不過，在setup Router的同一日，我部Pocket PC既火牛壞左~~
一向Pocket PC用Wi Fi 都比較食電，唯有插住USB差電~~

因此，我部Pocket PC可以無線上網，但係要駁住條USB線....
駁住條線來無線....
(無線...駁線...無耐~~~)

插曲：懷疑老豆一直用緊鄰家既無線上網，白交上網費。

棋王公公

返工期間，路經上環卑利街，石板樓梯邊見一古玩商舖。
內有海軍陸戰棋、排九、麻雀等。
其中最吸引我視線既，係一副水晶中國象棋。
每個捉棋既人，總想擁有一副精美既象棋，
令我諗起兒時同公公捉棋既時光。

兒時探訪公公，總愛與他下棋，一捉就停唔到，要捉夠整個下午才擺手。
這份情誼會藏在心底，或許公公唔會知，
公公係棋王，從來只有佢贏，我輸。但直至我贏過一次之後，媽媽就話公公老，開始無精神捉，那是我最後一次同公公捉棋。

除左捉棋，記得有一次公公白內障，我畫左張咭俾公公，但公公當時睇唔到，我就讀俾佢聽。當時我仲讀緊小學，張咭係我親手畫，封面以紅色同藍色畫出十字架形狀裝飾。

還有BB時公公抱起我影合照，我一手抓住公公既鬍鬚，一齊笑~~

仲有教會音響房對出最右下角既一張凳，公公總愛坐這張。

教我捉象棋既公公，在我心目中永遠係棋王既公公，天家再見~~

生活小品

早兩日馬騮發起條為食根，突然想食馬仔。
今晚收工經過灣仔，見到某間麵包舖有得賣，咪買返屋企，諗住逗下馬騮開心。

返屋企，醃過今晚要煮既豬扒後，返書房研究兩部電腦。因為屋企終於有兩台電腦，但未試過設定同時上網，及接駁網路芳鄰，讓兩台電腦可交換檔案。

往後，馬騮收工返屋企，我送上馬仔三件，加句：
「當我見到件馬仔，我諗起你。」
馬騮好開心：「你係第一次買小食俾我食架~~」

滿足既我，正想轉身返回廚房煮飯之際，豈料，唔記得煲飯~~換來馬騮冷笑三聲~~呵呵呵！
於是，大家唯有等飯熟。

又過一陣，終於駁通兩部電腦同時上網及交換檔案，出廳宣報這喜訊。

我：「我地以後唔使爭電腦用啦！」
馬騮冷言：「既然可以一齊上網，唔記得煲飯都係值得既~~」
我(汗)：「...好在今日買左件馬仔墊底~~」

~~~~~~~~~~~

同一晚上
馬騮：「醃豬既汁都係紅色，建議你都係唔好倒落去煮。」
我：「吓，果D醃汁係有味架，等豬肉收水後，倒落去再煮至夠味架~~」

最後，俾我發現馬騮，偷偷走去廚房，倒左D淹汁，仲係d豬扒上面加鹽加醋，駁我唔發現~~

拆琴

早排電子琴無左Sustain，冒住壞琴風險，經過深思熟慮，我真係拆開左個琴修理~~
結果：整返好~~真係一次好過癮既體驗~~

MoMo與琴


修理前


步驟(1)鬆開螺絲


步驟(2)記下螺絲位置


步驟(3揭開琴外殼


琴鍵背後


步驟(4)找出Sustain電路板及修理


步驟(5)測試妥當，還原~
彈左首「搜神記」

同場加映，修理牆腳寛頻電線掣。因之前經常斷線，修理過後，搞掂！

步驟(1)鬆開牆腳掣

步驟(2)更換損壞電線

一份拍拖時既禮物

今晚執屋時，無意之間搵返一份拍拖時送俾馬騮既禮物。

馬騮還記得：無時無刻的溫暖，當年寶箱內藏着暖手器。


待打開寶箱那刻，傳達驚喜與溫暖~~


唉！~~當年~~

第一餐新鮮魚

煮飯以來，只會煎雪藏龍脷柳，今餐係第一條新鮮魚

滷水雞翼&香煎倉魚

新咖啡杯

花左一整晚，北角西環逛左數小時，終於搵到隻幾鐘意嘅杯。
返到屋企後，又用幾個鐘頭搵杯蓋。由於杯口闊，搵齊全屋都搵唔到一個夠大既杯蓋。
遲下打算上網搵一隻矽膠杯蓋，而蓋邊係有個凹位，可以放支匙係杯內。
(如果blog友知道香港邊度有得賣，不妨單聲~~)

矽膠杯蓋

辦公室偷閒組合

打算放隻新杯係辦公室，沖咖啡飲。
返工時嘆一杯咖啡，
除左提神，換來片刻休息之外，
還代表對新工作環境嘅歸屬感漸大。

公司張櫈，竟然舒服過屋企果張~~

拍拖時憧景：將來一齊搭車返工、放工
並肩逛傢俬舖添置茶具
今日淡淡實現~~

(自已晾衫時寫)


經歷夢想與現實之間，
細味溫馨，同時，輕笑：又如何。
慨嘆，每階段追求既都唔同。

緊隨新老闆，路經舊公司樓下，沒法回頭那感覺，回億不禁浮現~~
拋棄以往建立嘅工作模式，不復往日同事之間享受既友誼~~隨着立下決定那刻，一去不返~~
此時，腦海響起 Bossa Nova， Flute扭下扭下嘅旋律~~
概嘆...打工往往逆流而上...
連想停低寫下旋律嘅時間，都唔容許~~

聽眼科醫生話：原來人既眼球，當瞪大眼後，再立即合上，眼球係會向上，唔信試下~~

主要用來幫唔聽話既細蚊仔~~

返工狂畫AutoCAD
旁邊同事爆爛Gag
偷閒Facebook Remove Tag
老闆蒞撳Alt-ernate Tab

上司履歷

室內裝修施工相片紀錄


技工B...上司(慳爺)

今日同新上司睇施工相片紀錄，研究一單半年前維修過既天台防水，近期又再滲漏。
因為這張相，我聽左上司如何鬥奮向上既打工身涯。

事因呢單防水工程，係我其下一名技工，識少少就亂來既蘇洲屎~~
上司好有心機，因為我要管技工等下屬，同我逐一分析每位技工履歷。令我識得按住各人既技能，分配適合既工種，按資排輩。

上司開始：技工A，之前修補一單停車場滲漏工程，用過一種防水材料，覺得好好用，於是當寶，係今次呢單天台防水工程內，用返同一種防水材料。但係，佢做完又唔滙報，又唔知道之前用既材料，只適用於室內，而天台屬長期被日光照射既位置，防水料係唔適合係戶外使用。所以，補過後，只可以捱幾個月，半年後，就會返漏。
總括而言，技工A：手工粗劣，只適合於一般手作~~

技工B：受過正統訓練，手工比較幼細，適合豪裝室內。

跟住，上司繼續....技工C...D...Z.........

講到呢度，聽過所有技工經驗後(以上只係簡化版，以省略其中技能、行頭出身，曾工作地盤，公司等)。當我以為可以討論返單維修工程，豈料~~


上司：講完所有技工履歷，輪到講我自己既履歷
我：(呆....)


於是，上司由佢做管工，慢慢攀升，由墨斗至舖地下水管，測量至Site Agent，打摏至風火水電，建築至維修，轉換一間又一間公司，直至識得我現任老闆為止，一一盡錄。

我聽完，已經個半小時~~

一邊聽住呢段血淚史，內心既佩服佢積極尋問既態度之餘，又詫異佢竟然肯花心機時間係我呢位剛轉過來數日既薯仔身上。佢坦言，際遇好，在每間公司內，均遇到一位肯教既上司。
至於我，打左咁多間工程公司以來，從未遇過。咁多年以來，只係靠自己試，自己摸，自己搵答案。
今日，我際遇好，終於遇到呢位肯耐心教，耐心講解既上司，可以肯定地告訴我，闊至整過施工工序，細至各種材料特性，及各種注意事項。

使驥不得伯樂，安得千里之足？遇到呢位新上司，係我既福氣。
因此，我連國泰有監管維修工程人員一職既interview，亦拒絶嘗試。心想，國泰offer常在，肯教既師傅難求。

聽完故事，已經過左半日，枱面份圖同張order一概未掂過~~剩返半日就收工，都係我既福氣~~

同時明白到，要下屬服你，只要你肯教，佢覺得你有知識，而佢又肯學既話，自然服你。

話時話，我上司無論樣貌、身型、及語氣，都有七分似飾演電視劇「巾幗梟雄」既彭慳。返工見到上司，放工電視內又見到慳爺，都幾係野。

Music Player變為隨機抽播一少段

致Blog友：

關於右手邊既Music Player，本來會播哂整首歌，但今日發現，imeem.com竟然自動變為每首抽播一少段。

Nevermind，錯有錯着，其實一直想搵有這function既Music Player，好似GTA既收音機。
想聽全首，可按Player頂最右既(？)

謝謝收聽~~


(係打完呢篇blog之後，個Music Player 又返回原狀，播哂全首~~係咪玩野？！~~)

唔會有唔識做野既人，只會有唔肯做野既人。

(見到馬騮第一次熨衫~~)

讀書果位，幾專心..........影相~~

要專心考試/唔想返工，盡快跳落維景酒店，仲有兩日~~

轉工作時間 1100~2300

這兩星期以來，工作大大轉變~~
每夜收工乘搭電車回家，
寒風吹過，路軌聲與柔黃街燈送我歸家。
雙腳疲累至毫無知覺。

崇拜，團契生活一一與我無干。
本有機會與某位期待以久的崇拜主席合作，
當司琴的，總期待與主席擦出敬拜火花，
由主席帶動會眾，充滿聖靈運行，
這時，司琴便會更投入地潤澤現場氣氛，
指尖彈奏出超越自己，
靠著那加給我力量的耶和華以勒，
事奉與敬拜合而為一的化境。
可是，這火花只停留在電郵附件的rundown紙上，
在練習以先，早已成為泡影。

工作時間雖長，但總算與舊生活模式來過了斷。
即使面對惡毒上司，但蠻享受低頭忘我工作。
他的指令，是需要下屬無時無刻在忙着。
(他瞪着眼，吹毛求疵，但站着休閒地道。)

男人的苦，是說不出口的苦。
打Blog的躊躇，是寫不出的躊躇。
生活迫人，有苦自己知，
心相信，新生活總會來臨。