截水不行，改截電!!

山頂豪宅停車場擺放一部洗衣機，原意係當租戶洗衣機壞時，賓妹可以落停車場洗衫。

原意係好，後來發覺無壞洗衣機嘅賓妹亦偷偷地用。因為賓妹唔想留喺屋企洗，可以蛇皇落樓下洗，透透氣(懶！)。

屢次勸告管理員監管，管理員又監管不力(懶！！)。

唯有出此下策，截水源，洗衣機無水入，就用唔到。
只要在洗衣機入水龍頭位置加鎖，由管理員保管鎖匙，賓妹如果要用洗衣機嘅話，要問過管理員借匙。


系統設計好，到實行喇！

於是我叫技工加鎖。

我：「技工，在水龍頭位置加鎖！」

技工：「吓！果度有兩個水龍頭，一個俾洗衣機，一個俾洗地用喎。我驚賓妹會將洗地條喉插落俾洗衣機度用喎！(其實係懶唔想加鎖)」

我：「咁截水唔得，截電咪得囉！」

技工：「……」

我：「加個電掣掣面，要靠鎖匙才會駁電。(忽發奇想，醒起教會副堂電子琴用緊果套掣面)」

技工：「吓！咁X複雜！」

對付懶人，就要諗下辨法。

賓妹有賓妹偷懶，心果句：「落樓下蛇王。」
技工有技工偷懶，心果句：「唔裝得唔得呀！」
管理員有管理員偷懶，監管不力：「咁多人出出入入，點睇？！」
管理管理，我呸!經驗話我知，幾時都係人最難管。
特別係懶人最難管。
懶人邊度嚟？通常都係由練精學懶。
即係果啲喺公司辨做野，其實打緊blog，又精又難管。

最開心係，這個「用鎖匙控制電掣掣面」係透過平時觀察，方可以提議。
而當我提議給上司時，上司竟然同意我嘅建議，設計及實行。

有無試過腦海內播歌時會食碟？

Master Program

不愧為Excel王~~

公司搬新寫字樓，自行包辦裝修。今日剛定好E&M承判商，明日開會，開會前要制定各判頭進場、施工、完工日期。

平時畫Master Program, 會用software叫「MicroHARD Project」。但花左兩小時都裝唔到，唯有灰仔地用Excel畫。

一提再提

買牛肉

黃昏，街巿樓下，電話內同馬騮定下今晚買咩餸。
「就番茄炒蛋、蒜蓉炒生菜、草菇炒牛肉。」
「都係唔好、乍菜蒸豬肉。」

於是我行去買慣嘅豬肉檔度
「十蚊牛肉唔該！」
豬肉佬手起刀落之祭，呆左一呆，望一望我。
「丫唔係，十蚊豬肉唔該。」

一提再提

同日，由於馬騮鐘意食紅提，一向屋企買開，都係紅提。

就連招呼朋友上屋企時，都係由我買紅提。

但係我其實鐘意食青提，可憐嘅我昨日忍唔住講左句，

我：「唔通我呢一世都食唔到青提？！」

馬騮：「你鐘意食青提可以自己買架。」

於是結婚近兩年半嘅我，今日第一次為自己買生果食，青提。

不過我都會預埋馬騮果份，買左半磅青提半磅紅提。

點知，返到屋企打開雪櫃，原來昨晚馬騮袋紅提未食哂，買多左一份。

往後，馬騮放工返屋企，

馬騮：「估下我買左咩俾你食？」

我：「蛋糕？」

馬騮：「錯！係你鐘意食嘅青提！！」

我：「......」

結果雪櫃足足有成3袋提子。

我地以慣常一句為總結：「我地係無默契。」

或者咁講，「無默契就係我地嘅默契。」

兩個人邊食到咁多！！

嘭鴨

今期推介--嘭鴨!!總會引人傻笑嘅紙牌遊戲~~

IRIS

韓劇Iris效應，過度投入，就算獨個兒往大快活買焗豬扒飯熱奶茶外賣，都當成任務。

等叫號攞飯之際，攞電話出嚟係咁篤，當自己使用軍事偵察儀器。避開街邊途人、車輛，及地雷，高速趕回家。沖過靚涼，醫飽肚子，繼續煲。

相比起日台劇，韓劇無論集數及每集長度均較長，每集足足一個小時。二十集二十小時，本來想分兩晚內煲，但太眼瞓瞓左，任務失敗。

由於實在太吸引，等不及粵語版，直接聽韓語，發覺原來韓語有部份音節與粵語相似。例如「局長」韓語同樣是「局長」。

韓劇Iris與台劇痞子英雄，此類諜報題材同樣是當地處女作品。Iris拍攝地域較廣，分別於匈牙利、日本、上海、南北韓取景; 痞子則局限於台南台北。Iris主線是軍事政變，被效忠的組織背叛追殺，同時成為南北國狙擊目標，男女主角浪漫相愛，卻被迫分開，不惜任何代價亦要完成任務，卻敵不過一個「情」字。而痞子則是幕後黑手一個接一個出現，背後組織一個比一個龐大，逐步揭開身世之謎。

男主角真係好型好迷人，演技一流，蒙住面罩都能交戲，對眼識得講野~~

官網http://www.kbs.co.kr/drama/iris/index.html